اسلام آباد: پاکستان کرکٹ بورڈ نے دوسرے ایڈیشن سے قبل پی ایس ایل کو کمپنی کا درجہ دینے کیلیے تمام قانونی عمل مکمل کر لیا۔

ذرائع کے مطابق بعض آئینی و قانونی پیچیدگیوں کے باعث سیکیورٹی ایکسچینج کمیشن آف پاکستان سے پی ایس ایل کی رجسٹریشن کا عمل مکمل نہیں ہو سکا تھا، بورڈ کے اعلیٰ حکام نے اپنی قانونی ٹیم کے ساتھ مل کر تمام عمل کو مکمل کر لیا ہے جس کے بعد رواں ماہ اس کی رجسٹریشن کرائی جائے گی۔

اس ضمن میں پی سی بی ایگزیکٹیو کمیٹی کے سربراہ نجم سیٹھی نے کہاکہ سپر لیگ کو منافع بخش بنانے اور پرائیویٹ سیکٹر سے سرمایہ لانے کیلیے ہم نے اپنی کوششیں جاری رکھی ہوئی ہیں، کمپنی کا درجہ ملنے کے بعد ڈائریکٹرز کی اکثریت پرائیوٹ سیکٹر سے ہی ہو گی،اس حوالے سے معاملات کو حتمی شکل دے دی گئی ہے۔