برمنگھم: تیسرے ٹیسٹ کے دوسرے روز انگلینڈ کے 297 رنز کے جواب میں پاکستان نے دوسرے دن کے اختتام تک 3 وکٹوں کے نقصان پر 257 رنز بنالیے ہیں جب کہ قومی ٹیم انگلینڈ کو اچھی لیڈ دینے کی پوزیشن میں آگئی ہے۔

برمنگھم کے ایجبسٹن گراؤنڈ میں کھیلے جا رہے میچ کے دوسرے روز پاکستان نے پہلی اننگز میں دوسرے دن کے اختتام تک 3 وکٹوں کے نقصان پر 257 رنز بنالیے ہیں۔ پاکستان کی جانب سے محمد حفیظ نے سمیع اسلم کے ساتھ اننگز کا آغاز کیا لیکن محمد حفیظ جیمز اینڈرسن کے پہلے اوور کی چوتھی گیند پر کیچ آؤٹ ہوگئے جس کے بعد نئے آنے والے بلے باز اظہرعلی نے سمیع اسلم کے ساتھ محتاط انداز اپناتے ہوئے اسکور کو آگے بڑھایا اور دوسری وکٹ کے لیے 181 رنز کی شاندار شراکت داری قائم کی لیکن بدقسمتی سے سمیع اسلم 82 رنز پر رن آؤٹ ہوگئے

تاہم اس دوران اظہر علی نے اپنے کریئر کی 10ویں سنچری اسکور کی جس کے بعد انہوں نے پش آپس لگا کر اپنی خوشی کا اظہار بھی کیا وہ دوسرے دن کے آخری اوور میں 139 رنز کی اننگز کھیل کر آؤٹ ہوئے جب کہ یونس خان 21 رنز کے ساتھ وکٹ پر موجود ہیں۔

اس سے قبل کھیل کے پہلے روز انگلینڈ کی پوری ٹیم 297 رنز پرپویلین لوٹ گئی تھی اور گیری بیلنس 75 اور معین علی 63 رنز کے ساتھ نمایاں بلے باز رہے جب کہ پاکستان کی جانب سے شاندار بولنگ کا مظاہرہ کرتے ہوئے سہیل خان نے 5، محمد عامر اور راحت علی نے 2،2 جب کہ یاسر شاہ نے ایک وکٹ حاصل کی۔

قبل ازیں پاکستان کے کپتان مصباح الحق نے انگلینڈ کے خلاف ٹاس جیت کر پہلے فیلڈنگ کا فیصلہ کیا جب کہ پلیئنگ الیون میں 2 تبدیلیاں کی گئی، اوپنر شان مسعود کی جگہ سمیع اسلم اور وہاب ریاض کی جگہ سہیل خان کو موقع دیا گیا ہے۔

دوسری جانب انگلش قائد الیسٹر کک کا کہنا تھا کہ پاکستان پر دباؤ قائم رکھنے کی کوشش کریں گے۔ ان کا کہنا تھا کہ ٹیم میں ایک تبدیلی کی گئی ہے اور اسٹیون فن کی ٹیم میں واپسی ہوئی ہے۔

واضح رہے کہ دونوں ممالک کے درمیان 4 ٹیسٹ میچز کی سیریز ایک ایک سے برابر ہے، پہلے ٹیسٹ میں پاکستان نے انگلینڈ کو شکست سے دوچار کیا تھا جب کہ دوسرے ٹیسٹ میں پاکستان کو شکست کا سامنا کرنا پڑا۔