مانچسٹر: مانچسٹر ٹیسٹ کےدوسرے روزانگلینڈ کی پاکستان کے خلاف پہلی اننگز میں بیٹنگ جاری ہے۔ مانچسٹر کےاولڈ ٹریفورڈ گراؤنڈ میں کھیلے جا رہے دوسرے ٹیسٹ کے دوسرے روزانگلینڈ کی پاکستان کے خلاف اپنی پہلی اننگز میں بیٹنگ جاری ہے۔
پہلے روز انگلینڈ کی جانب سے الیسٹر کک اور ایلکس ہیلز نے اننگز کا آغاز کیا۔ محمد عامر نے ساتویں اوور میں 25 کے مجموعی اسکور پر ایلکس ہیلز کو بولڈ کر کے انگلینڈ کو پہلا نقصان پہنچایا تاہم کپتان نے جوئے روٹ کے ساتھ ملک کر 185 شاندار شراکت داری قائم کی اور اس دوران انہوں نے ٹیسٹ کیریئر میں اپنی 29ویں سنچری بھی مکمل کی تاہم محمد عامر نے کک کو 105 رنز پر بولڈ کرکے پویلین بھیج دیا۔ جوئے روٹ نے جیم ونز کے ساتھ ملکر تیسری وکٹ کیلیے 28 رنزکی شراکت داری قائم کی اور روٹ نے اپنی سنچری بھی مکمل کی جب کہ جیم ونز 18 رنز پر راحت علی کا نشانہ بنے جب کہ گرے بیلنس نے 23 رنز بنائے، پہلے دن کے اختتام پر جوئے روٹ 141 اور کرس ووکس 2 رنز پر وکٹ پر موجود تھے۔ پاکستان کی جانب سے محمد عامر اور راحت علی نے 2،2 وکٹیں حاصل کیں۔ قبل ازیں انگلینڈ کے کپتان الیسٹر کک نے ٹاس جیت کر پاکستان کے خلاف پہلے بیٹنگ کا فیصلہ کیا۔ انگلش کپتان کا کہنا تھا کہ ٹیم میں جیمی اینڈرسن اور بین اسٹوکس کی واپسی ہوئی ہے اور معین علی بھی انگلش ٹیم کا حصہ ہیں جب کہ عادل راشد کو موقع نہیں دیا گیا جب کہ پہلی اننگ میں بڑا اسکور کرکے پاکستان کو دباؤ میں لانے کی کوشش کریں گے۔ دوسری جانب قومی ٹیم کے کپتان مصباح الحق کا کہنا تھا کہ ہم بھی ٹاس جیت کر پہلے بیٹنگ کا ہی فیصلہ کرتے تاہم گیند کی موومنٹ کا فائدہ اٹھانے کی بھرپور کوشش کریں گےجب کہ اولڈ ٹریفورڈ ٹیسٹ ہمارے لئے بڑا چیلنج ہے، اچھی کارکردگی کا تسلسل جاری رکھنے کے لئے پرعزم ہیں۔