لندن: انگلش کاؤنٹی کے سابق کرکٹر ٹام ایلن نے ٹوریج پل سے دریا میں کود کر خودکشی کرلی۔

وورکشائر کے 28 سالہ سابق بولر چند ماہ قبل کار حادثے کا شکار ہوئے تھے جس میں ان کی ٹانگوں کو شدید نقصان پہنچا تھا جس کے بعد وہ شدید ذہنی اور جسمانی اذیت سے دوچار تھے، حکام کو ان کی لاش ڈیون میں ٹوریج برج کے نیچے سے مل گئی ہے۔ سابق کرکٹر کی خودکشی سے قبل ڈیون اور کارن وال پولیس کو ان کے گھر سے اہلخانہ کے نام لکھے گئے تین خطوط ملے ہیں، ایلن کے والدین نے کہا کہ ان کا بیٹا اکتوبر سے بیمار تھا اور موت سے قبل اس نے چند ماہ انتہائی اذیت میں گزارے۔

پولیس کو ابتدائی تحقیقات میں کسی تیسرے فرد کی موجودگی کے نشانات نہیں ملے اور پوسٹ مارٹم رپورٹ میں ان کے جسم میں کسی قسم کی منشیات یا الکوحل نہیں پایا گیا، پولیس کے مطابق اس بات میں کوئی شک نہیں کہ ایلن نے خود اپنی جان لی اور وہ اس بات سے واقف تھے کہ ان کے اس عمل کا کیا نتیجہ برآمد ہوگا۔