جرمنی میں 2 پاکستانی ایتھلیٹس کے غائب ہونے کا معاملہ، اسپورٹس بورڈ نے تحقیقاتی کمیٹی قائم کردی
اسلام آباد: پاکستان سپورٹس بورڈ ( پی ایس بی ) نے جرمنی میں منعقدہ ایف آئی ایس یو ورلڈ یونیورسٹی گیمز 2025میں 2 کھلاڑیوں کےلاپتہ یا فرار ہونے، ٹیم آفیشلز کے انتخاب کے معیار ، ڈسپلن اور لاجسٹک ایشوز کا نوٹس لیتے ہوئے معاملے کی جانچ کے لیے کمیٹی قائم کر دی ہے۔
سرکاری خبر رساں ایجنسی اے پی پی کی رپورٹ کے مطابق ڈائریکٹر پی ایس بی لاہور کی سربراہی میں قائم 3 رکنی تحقیقاتی کمیٹی 15 دن میں جامع رپورٹ پیش کرنے کی پابند ہوگی، پی ایس بی نوٹیفکیشن کے مطابق ایف آئی ایس یو ورلڈ گیمز جرمنی میں پاکستانی دستے کی شرکت میں سنگین بے ضابطگیاں سامنے آئیں۔ نوٹیفیکشن کے مطابق ٹیم آفیشلز کے انتخاب، نظم و ضبط، لاجسٹک ایشوز اور 2 کھلاڑیوں کے غائب ہونے جیسے سنگین مسائل رپورٹ ہوئے۔ ماسوائے ایک کوچ کے، تمام ٹیم آفیشلز ہائر ایجوکیشن کمیشن (ایچ ای سی) یا جامعات کے افسران تھے جس سے شفافیت پر سوال اُٹھے۔ ایچ ای سی کے مطابق مقابلے کے دوران 2 طالبعلم ایتھلیٹس کے لاپتہ یا فرار ہونے کی اطلاع دی گئی، خواتین کے ریلے ٹیم مقابلوں کے لیے نااہل قرار دیا گیا، ایک جوڈو ایتھلیٹ نے کوچ اور مناسب مقابلہ جاتی یونیفارم کے بغیر مقابلوں میں شرکت کی۔ ان حقائق کی روشنی میں پی ایس نے 3 رکنی تحقیقاتی کمیٹی قائم کی ہے،کمیٹی کی سربراہ ڈائریکٹر پی ایس بی لاہور نورش صباح جبکہ نصرا للہ رانا اور سیف الراحمان رائو ممبران ہوں گے۔ تحقیقاتی کمیٹی ایچ ای سی کی جانب سے ایتھلیٹس اور ٹیم آفیشلز کے انتخاب کے طریقہ کار، بنیاد اور شفافیت کا جائزہ لے گی،کمیٹی دستے میں شامل ہر آفیشل کی ذمہ داریوں کا تعین گی کہ ان کی شمولیت مروجہ اصولوں کے مطابق تھی یا نہیں۔ کمیٹی 2 ایتھلیٹس کے لاپتہ یا فرار ہونے کے حالات کی چھان بین، واقعات کا وقت وار جائزہ اور غفلت یا نااہلی کے ذمہ داران کی نشاندہی کرے گی،کمیٹی خواتین ریلے ٹیم کی نااہلی کے اسباب کی تحقیق، تیاری، انتخاب یا نگرانی میں کوتاہی کی بھی نشاندہی کرے گی۔ ٹی او آر کے مطابق کمیٹی یہ تعین بھی کرے گی کہ جوڈو ایتھلیٹ کو مقابلہ یونیفارم کیوں فراہم نہیں کیا گیا اور وہ کوچ کے بغیر کیوں شریک ہوئی۔ کمیٹی بدانتظامی، غفلت یا فرائض میں کوتاہی کے مرتکب افراد کے خلاف مناسب کارروائی کی سفارش کریگی، 3 رکنی کمیٹی نوٹیفکیشن کے اجراء کی تاریخ سے 15 دن کے اندر جامع رپورٹ پیش کرنے کی پابند ہو گی۔ واضح رہے کہ جرمنی میں جاری ورلڈ یونیورسٹی گیمز کے دوران 2 پاکستانی ایتھلیٹس 26 جولائی کو غائب ہو گئے تھے۔ پاکستانی دستے میں شامل شازل احمد اور ندیم علی سے 24 جولائی کو نامعلوم مقام پر چلے گئے تھے، قومی دستے میں شامل آفیشلز نے غائب ہونے والے ایتھلیٹس سے رابطہ کرنے کی کوشش کی تاہم دونوں ایتھلیٹس سے کوئی رابطہ ممکن نہیں ہو سکا۔
